meri qismat ko jaga do ya rasool
ek jhalak apni dikha do ya rasool

khwaab mein tashreef la kar aik baar
deed ka sharbat pila do ya rasool

aa gaya beemaar aye mere tabeeb
to shifaye kamila do ya rasool

umr bhar teri sana khwani karoon
har rukawat ko hata do ya rasool

woh kabhi bhi uth nahi sakta jise
tum nigaahon se gira do ya rasool

baksh dega har khata meri Khuda
tum zara lab ko hilaa do ya rasool

umr isiaa kay sabab barbaad hai
tum khatayein bakshwa do ya rasool

na kahoon tum se to phir kis se kahoon
meri bigri ko bana do ya rasool

chaand ko ungli se mehd-e-paak mein
jis taraf chaho jhuka do ya rasool

sooi mil jaye andhera bhi ho gar
tum jo aa kar muskura do ya rasool

tum jo chaho to phira kar shams ko
raat ko bhi din bana do ya rasool

ghair kay dar per mein jaoon kis liye
jub talab se tum siwa do ya rasool

hai bara weeran shaha qalb-e-ubaid
apnay jalwon se basa do ya rasool