yeh aarzoo nahi kay duaaein hazaar do
parh kar nabi ki naat lahad mein utaar do

suntay hain jaan kani ka hai lamha bohot kathin
laikar nabi ka naam ye lamha guzaar do

mere kareem mein tere dar ka faqeer hoon
apnay karam ki bheek mujhe baar baar do

gar jeetna hai ishq mein laazim yeh shart hai
khelo agar yeh baazi to har cheez haar do

yeh jaan bhi zuhoori nabi kay tufail hai
is jaan ko huzoor ka sadqa utaar do